Pa, Ma. Ek is gay

VOORWOORD

‘n Self help boek vir ouers van gay kinders

Jy moet ‘n ouer wees om die hart van ‘n ouer te verstaan. Geen opleiding in Sielkunde, Teologie, Opvoedkunde of Pediatrie kan jou leer hoe ‘n ouer se hart werk nie. 9 Maande se wag, 12 maande se dra, 24 maande se kop vas gryp, 60 maande se loop en soek en ‘n leeftyd se bekommernis en gebede leer jy nie in ‘n boek nie. Selfs al is jy ‘n ouer, loop elke pad van ouerskap verskillend, nie slegs van ouer tot ouer nie, maar ook van kind tot kind. Nie twee kinders se pad is dieselfde nie en wat ook al vir die een kind werk, werk nie vir die volgende kind nie. Niks wat hier staan is vir jou as ouer nuus nie. Jy en ek het dit met duur lesse in die praktyk geleer. Ons leer dit steeds elke dag, want ouerskap hou nooit op nie – dit is ‘n lewenslange taak.

Omdat my en jou soort ouerskap van mekaar verskil en omdat ons kinders van mekaar verskil het ek nie vir jou al die antwoorde nie. Dit is nie omdat ek nie baie hiervan weet nie, dis net omdat elke ouer se pad met sy/haar kind verskil en ek gaan nie maak asof ek alles weet nie. Ons almal ken daardie ou boekies wat vir jou vertel hoe jy as ouer moet maak en ons almal lees hul so ent weg totdat ons besef dit gaan nie vir ons werk nie. Mense is uniek, ouers is uniek en verhou-dings tussen ouers en hul kinders is uniek.

Hierdie “gay-ding” waarmee jou kind vorendag gekom het gaan natuurlik julle unieke verhouding nog verder kompliseer. Julle gaan nou ‘n nog vreemder pad met mekaar stap. Vir sommige ouers is dit makliker as vir ander, maar vir sommige ouers is dit die steilste pad wat hul nog ooit saam met hul kind moes stap. Ek kan hierdie pad nie vir jou stap of selfs vir jou sê hoe moeilik dit vir julle gaan wees nie. Al wat ek vir jou kan doen is om jou te help om die pad so ‘n bietjie beter te verstaan en om vir jou ‘n paar slaggate te wys.
Mag ek sê dat ek jou so bietjie jammer kry; nie omdat jy ‘n gay kind het nie, maar omdat daar vir jou ‘n stukkie grondpad voorlê. Jy sal van voor af moet dink oor jou ouerskap en jy sal jou verhouding met jou kind moet aanpas, maar kom ek verseker jou in dieselfde asem dat dit een van die wonderlikste stukkies pad saam met jou kind kan wees as jy bereid is om dit toe te laat.

Voor ons ‘n tree vooruit gee wil ek jou net van drie dinge verseker: Eerstens moet jy weet dat jy nie ‘n fout gemaak het met die opvoeding van jou kind nie. Die gedagte dat ‘n seun gay is omdat hy ‘n oorbetrokke ma en ‘n afwesige pa gehad het is sommer twak. Die gedagte dat ‘n meisie lesbies is omdat sy saam met haar pa aan karre gewerk het is ook bog. Die ou storietjie van die pa wat sy dogtertjie soos ‘n seun aangetrek het of die ma wat met haar seun pop gespeel het kan jy ook maar weggooi. Niks wat jy gedoen het, het jou kind gay gemaak nie, want ‘n mens word nie gay gemaak nie en jy kan ‘n gay kind ook nie weer straight maak nie. Daarom wil ek hê dat jy enige skuldgevoelens oor iets wat jy dink jy verkeerd gedoen het sommer nou nek omdraai. Daarmee saam moet pa en ma enige beskuldigings teenoor mekaar sommer nou stopsit. Dit is nie julle skuld nie en niks wat julle anders kon doen sou julle kind straight gemaak het nie.

Tweedens is dit ook nie jou kind se skuld nie. Die oorgrote meerderheid van ons wat gay is weet dat ons so gebore is. Jy as volwassene ken tog jouself. Jy weet of jy ‘n kort humeur het of dalk baie lankmoedig is. Jy ken sekere van jou persoonlikheidstrekke en besef dat jy van die begin af so was. Jy het waarskynlik al baie hard probeer om van jou negatiewe eienskappe ontslae te raak, maar sonder sukses. Soos ons ouer word, maak ons vrede met wie of wat ons is, omdat ons besef dat ons gewoon so gemaak is. Natuurlik werk ons aan onsself, maar jy bly wie jy in jou wese is. Seksuele oriëntasie is een van daardie wesenskenmerke. Jy kan teen dit veg soos jy wil, maar jy bly wie jy is. Moet dus nie jouself as ouer blameer nie, maar moet ook nie jou kind blameer nie. Help mekaar eerder om vrede te maak met hierdie eienskap van jou kind wat nie gaan verander nie. Miskien verskil jy hewig van dit wat ek hier sê, maar moet asseblief nie die boek vir hierdie rede neersit nie. Ek is oortuig dat jy baie hieruit kan leer en dat dit jou verhouding met jou kind kan verbeter. Al verskil jy dus tot die einde van die boek steeds van my, is ek oortuig dat julle mekaar beter sal verstaan.

In die derde plek moet een en twee hierbo nie by jou die indruk wek dat daar iets met gaywees verkeerd is nie. As ek sê dat dit nie jou of jou kind se skuld is nie, mag jy dalk dink dat gaywees net negatief of ongelukkig is. Dit is hoegenaamd nie waar nie. Daar is ‘n besondere plek vir gay mense in hierdie wêreld. Die Indiane in Noord Amerika glo al vir geslagte lank dat gay mense twee siele het, ‘n manlike en ‘n vroulike siel. Daarom beoordeel hulle gaywees totaal anders as die Westerse samelewing waarvan ons deel is. Vir hulle is gay mense die ideale geestelike leiers, die ideale “sielkundiges”, die ideale troosters en die ideale versorgers. Gay mense het dus ‘n ereplek in hulle samelewing. Verstaan my mooi, ek sê nie ons moet nou vreemde gedagtes navolg nie, maar dink bietjie; is jou gay kind nie die een wat die meeste omgee in julle huishouding nie?

Onthou hierdie is eintlik ‘n selfhelp boek vir ouers van gay kinders. Gebruik dit dus as deel van jou taak as ouer. Werk dit eers self deur en daarna kan jy, as jy wil, dit ook met jou kind deurwerk. Aan die einde van hierdie boek is daar drie bylae wat jy op enige stadium kan deurwerk as dit jou sal help. Die eerste is ‘n vraelys, maar ek bespreek dit in Hoofstuk 1. Die tweede is ‘n deel oor die Bybel en gaywees. Indien jy ‘n Christen is, sal dit sekerlik vir jou belangrik wees om te weet hoe jy hieroor moet dink. As dit nie vir jou ter sake is nie kan jy bloot daarvan kennis neem. Die derde bylaag sluit ‘n paar ware verhale oor gay persone en hulle ouers in. In my ondervinding oortuig argumente ‘n mens nie en argumente help jou ook nie beter verstaan nie, maar ander se verhale doen. As jy van ander se verhale hoor, verstaan jy dikwels ook jou eie ‘n bietjie beter. Lees hulle sommer so tussen in as jy wil.

Latest Posts

  • The Unbearable Pain of Being
    The Unbearable Pain of Being
    Foreword Anli Schuin 20 February 1968 – 13 November 2003 On 13th November 2018 we will mark the 15th anniversary of the night Anli, our daughter, sister, mother, aunt and sister-in-law, ended her own life and changed all our lives for ever. This collection of poems and...
  • Afrikaans-Japannese Woordeboek
    Afrikaans-Japannese Woordeboek
    アフリカーンス語・日本語辞典 Die Suid-Afrikaanse Akademie vir Wetenskap en Kuns het vroeër vanjaar (2018), ‘n besondere Erepenning toegeken aan prof. E.F. (Ernst) Kotzé vir uitnemende bydrae tot en diens aan Afrikaans as wetenskaps- en standaardtaal. Prof. Kotzé is emeritus hoogleraar en navorsingsgenoot en dosent van die Nelson Mandela Universiteit in Port Elizabeth....

Teken in op ons nuusbrief

Vul die vorm in en stuur as jy ons gereelde nuusbrief wil ontvang.

In hierdie boek kyk Jean Oosthuizen krities na die NG Kerk se geskiedenis sedert Jan van Riebeeck se aankoms in die Kaap, tot waar die kerk vandag is. In sy bestaan van meer as 350 jaar het die NG Kerk en die Nasionale Party so verstrengel geraak dat die kerk as “die Nasionale Party in gebed” bekend gestaan het. Die teoloog Ferdinand Deist se voorspelling in die laat tagtigerjare dat die kerk sal ondergaan wanneer apartheid tot ’n einde kom, blyk vandag in die kol te wees. As instelling wat apartheid uit die Bybel geregverdig en verdedig het, het die kerk se vernietigende invloed nie alleen gemeenskappe in Suid-Afrika van mekaar vervreem nie – ook lidmate wat kritiese vrae gestel het, is na die periferie geskuif. Talle individue se menswaardigheid is geskend en verskeie loopbane is onder die dekmantel van Christenskap vernietig, soos die skrywer self kan getuig. Oosthuizen se blik strek egter wyer as sy ervaring toe hy in 2013 as nuusredakteur van Kerkbode geskors is ná die opspraakwekkende Woordfees-debakel. Sy reis vanuit die kerk se binnekring sluit die verhale in van gelowiges sowel as ongelowiges wie se paaie met die NG Kerk gekruis het. Die opkoms en ondergang van die NG Kerk bied ’n kontemporêre blik op die tragiese geskiedenis van ’n instelling wat deur die aandadigheid aan verontregting stelselmatig irrelevant geraak het.

Jean se boek kan by enige van die bekende boekwinkels aangekoop word of van takealot.com bestel word teen die afslagprys van R 229. Die Boek kan ook as e-boek (Kindle weergawe) by Amazon.com aangeskaf word.